Jonsokbunadsbok

Dette er innhaldet i jonsokbunadsboka:

Ideen til jonsokbunad til jente vart tent samtidig med OL-ilden på Lillehammer i 1994. Då var nokre 4H-medlemar frå Furuhaugen 4H og deltok under opningsseremonien - ikledd jonsokbunad. (Sjå HF-artikkel under).



Velforeninga søkte Odda kommune om midlar, og arbeidet kunne realiserast.

Anna Bjørkevoll starta prosjektet ved å få Alvhild Lofthus til å sy stakken. Deretter tok Liv Instanes Lund ansvaret for å skaffa folk til dei andre arbeida.

- Alvhild Lofthus, Eidesåsen har som sagt sydd stakken.
- Bringklut, fangband/belte og svart saum er vove av Margreta Rønning, Kinsarvik.
- Hardangersaumen til forkle var i si tid sydd av Anna Hus (Bestemor til Liv Instanes Lund).
- Kirsti Bay, Odda har sydd sneatrøya.
- Kari W. Hamre, Lofthus har sydd kaps og forkle.
- Perlebroderier på sneatrøya og på kruna er sydd av Hildegunn Instanes, Kinsarvik.
- Krunestativet er sveist av Kjell Kråkevik, Eidesåsen.
- Anne Kjersti M. Oppedal og Astrid Kråkevik, begge Eidesåsen, har montert og gjort perlearbeid på kruna.

Bunaden vart ferdig og innvid til jonsokfeiringa i Eidesåsen i 1996.

Alle som til kvar tid brukar bunaden må fara fint med den.

Etter bruk må brukaren skriva namnet sitt i denne boka med merknad om kva anledning bunaden vart brukt i. (Ved jonsokbryllup skriv ein namnet til både brura og brudgommen).

Bunaden skal inntil anna er bestemt oppbevarast hos Anne Kjersti M. Oppedal, Eidesåsen 68.

Jonsok 1996

Brur: Merete Lund.
Brudgom: Adrian Kråkevik.

Juli 1997

I juli -97 arrangerte Furuhaugen 4H i Eidesåsen Fylkesleir i Røldal. Saman med oss om arrangementet var 4H-klubbane i Skare og Røldal. Tone Berge var ei av brurene under opninga av leiren. Ho hadde "vår" bunad på seg.

Jonsok 1998

I fint vær vart jonsok-feiringa i år lagt til "Myra". Mange fant vegen til "Myra" trass VM i fotball.
Brur: Mari Gavle Stengårdsbakken
Brudgom: Nils Petter Karlsen.

9. juni 2000

9.6.00 vart det kjøpt inn beltespenne, og søljespenner til bringekluten. Det einaste bunaden no manglar, er ei sølja.

11. juni 2000

Det vart arrangert jonsokbryllaups-samling den 11.6.2000 i Kinsarvik og Lofthus i samband med Hardanger Musikkfestival og Kulturby Bergen 2000.

24 jonsokbrudepar var samla til framsyning, saman med spelemenn og skautekoner. Anne Lutro, på Lofthus, hadde ansvar for opplegget. Det var først eit program på ungdomsskulen i Kinsarvik, deretter opptog i Kinsarvik sentrum, og til slutt var det opptog og program på hotel Ullensvang på Lofthus.

Brur herifrå var Tonje Aasen (10,5 år). Brudgom herifrå var Henrik Andersen (9 år). Gutebunad lånt av Vegard Aasen, og hatt av Adrian Kråkevik. Sjå elles stensilert ark om opplegget for dagen.

5. april 2003

Eidesåsen velforening sin jonsokbunad blei lånt ut til "Jonsokbunadsutstilling -03", 27.04.03 - 08.06.03 på Norsk landbruksmuseum på Ås. Takkekort for lånet kan du sjå under.